បច្ចេកទេសដាំដំណាំបន្លែ

១.ការរៀបចំដី

• ភ្ជួរដីលើកទី១៖ ឲ្យបានជម្រៅ ២០-៣០សង់ទីម៉ែត្រ និងរាស់ដីឲ្យបានរាបស្មើល្អ សម្អាតស្មៅឲ្យបានល្អ រួចហាលដីឲ្យបាន រយៈពេល ៧-១០ថ្ងៃ ដើម្បីសម្លាប់ស្មៅ សត្វល្អិត និងផ្សិតចង្រៃ ធ្វើឲ្យដីមានរន្ធខ្យល់ល្អ។
• ភ្ជួរដីលើកទី២៖ និងរាស់ឲ្យបានរាបស្មើ បាចជីលាមកសត្វ ឬជីកំប៉ុស្តិ៍ទ្រាប់បាត ដើម្បីកែប្រែគុណភាពដី។
• រាស់បញ្ចូលគ្នារវាងជីលាមកសត្វ ឬជីកំប៉ុស្ត​ និងកំបោរកសិកម្ម(បើមាន) ឲ្យបានស្មើសាច់ ទុករយៈពេល ៧-១០ថ្ងៃ មុនពេលដាក់ដាំដំណាំ

១.១ ការលើករងដាំដំណាំ

• ត្រូវមានទទឹងរងប្រវែង ១ម៉ែត្រ ងាយស្រួលក្នុងការគ្រប់គ្រងស្មៅ និងសត្វល្អិត
• ក្នុងខែប្រាំងត្រូវលើករងកម្ពស់ ១៥-២០សង់ទីម៉ែត្រ និងខែវស្សាត្រូវលើករងកម្ពស់ ២០-៣០សង់ទីម៉ែត្រ ដើម្បីការពារដីជាំទឹក
• និងទុកចន្លោះសម្រាប់ថែទាំប្រវែង ៥០​សង់ទីម៉ែត្រ

១.២ ការរៀបចំរងដាំដំណាំ

• ការគ្របរងដោយគម្របសរីរាង្គ សម្រាប់ដាំបន្លែស្លឹក និងដើមមួយចំនួនដូចជា៖ ស្ពៃក្រញ៉ាញ់ ស្ពៃតឿ ស្ពៃចង្កឹះ សាលាដ ខាត់ណាដើម ដោយសារបន្លែប្រភេទនេះ មានដើមតូច និងត្រូវបុករណ្ដៅដាំញឹក។
• ការប្រើប្រាស់ចំបើង ឬសារធាតុសរីរាង្គផ្សេងទៀតគឺជាជម្រើសល្អបំផុត ក្នុងការរក្សាសំណើមដី និងការបំបែកសរីរាង្គ ឲ្យទៅជាជីកំប៉ុស្តសម្រាប់កែប្រែគុណភាពដី។

២.ការអនុវត្តន៍ការដាំដុះ

២.១ ការលាយល្បាយដីបណ្ដុះកូនដំណាំ

• វត្ថុធាតុសម្រាប់លាយល្បាយដីបណ្ដុះកូនដំណាំមាន៖ ធ្យូងអង្កាម ដីដំបូក ឬដីស្រទាប់លើ លាមកសត្វស្ងួត អំពុកចំបើង ឬស្រកីដូងម៉ត់។

បរិមាណលាយ៖

• • ធ្យូងអង្កាម ២៥%
  • ដីដំបូក ឬដីស្រទាប់លើ ២០%
  • លាមកសត្វស្ងួត ២៥%
  • អំពុកចំបើង ឬស្រកីដូងម៉ត់ ៣០%
• ត្រូវលាយល្បាយទាំង៤ប្រភេទចូលគ្នាឲ្យស្មើសាច់ល្អ

២.២ ការបណ្ដុះកូនដំណាំ

• សម្ភារៈសម្រាប់បណ្ដុះកូនដំណាំរួមមាន៖ គ្រាប់ពូជ ទ្រេ ឬថាសបណ្ដុះកូនដំណាំ ធុងស្រោច បន្ទះក្ដារសម្រាប់ពង្រាបដីបណ្ដុះ
• យកល្បាយដីដែលរៀបចំរួចដាក់ក្នុងទ្រេ ឬថាសបណ្ដុះ រួចពង្រាបដីដោយបន្ទះក្ដា បន្ទាប់មកយកទ្រេ ឬថាសបណ្ដុះថ្មីសង្កត់ពីលើ ដើម្បីធានាថាដីបណ្ដុះហាប់ណែនល្អ។
• ក្រោយមកយកគ្រាប់ពូជដាក់ក្នុងរន្ធបណ្ដុះប្រមាណ ១ ឬ២គ្រាប់(​សម្រាប់បន្លែស្លឹក)
• ចុងក្រោយត្រូវយកល្បាយដីបណ្ដុះមកបាចបន្ថែមតិចៗពីលើគ្រាប់ពូជ និងយកទៅដាក់ក្នុងរោងដំណាំ ទើបបាញ់ទឹកស្រោយស្រពដោយធុងបាញ់ទឹក២ទៅ៣ដងក្នុងមួយថ្ងៃ ឬនៅពេលដែលដីបណ្ដុះស្ងួត ឬកូនដំណាំស្រពោន។

២.៣ អាយុកាលបណ្ដុះកូនដំណាំ

ល.រ	ប្រភេទបន្លែ	រយៈពេលបណ្ដុះកូន
១	ខាត់ណាដើម	១៨-២១ ថ្ងៃ
២	ខាត់ណាផ្កាបៃតង	១៨-២១ ថ្ងៃ
៣	ខាត់ណាផ្កា ស	១៨-២១ ថ្ងៃ
៤	សាលាដក្ដោប	១៤ ថ្ងៃ
៥	សាលាក្រញ៉ាញ់	១៤ ថ្ងៃ
៦	ស្ពៃក្ដោប	១៨-២១ ថ្ងៃ

ល.រ	ប្រភេទបន្លែ	រយៈពេលបណ្ដុះកូន
៧	ស្ពៃក្រញ៉ាញ់	១៤ ថ្ងៃ
៨	ស្ពៃខៀវ	១៤ ថ្ងៃ
៩	ស្ពៃចង្កឹះ	១៤ ថ្ងៃ
១០	ស្ពៃជើងទា	១៤ ថ្ងៃ
១១	ស្ពៃតឿ	១៤ ថ្ងៃ
១២	ស្ពៃបូកគោ	១៤ ថ្ងៃ

 

២.៤ ការដាំកូនដំណាំ

• ជាទូទៅកូនដំណាំតម្រូវឲ្យដាំពេលរសៀល ដើម្បីកុំឲ្យកូនដំណាំចាញ់កម្ដៅព្រះអាទិត្យ និងមានលទ្ធភាពក្នុងការចាក់ឬសបានល្អ
• ត្រូវបុករណ្ដៅឲ្យប៉ុននឹងដីដែលដាក់ក្នុងរន្ធទ្រេ ឬថាសបណ្ដុះកូន ដោយកំណត់ប្រវែងចន្លោះគុម្ពទៅតាមប្រភេទនៃបន្លែ
• ក្រោយដាំកូនដំណាំ ក្នុងករណីកម្ដៅព្រះអាទិត្យកើនឡើងខ្លាំងនៅរដូវប្រាំង គួរមានស្បៃបន្ថយកម្ដៅ ឬធាងដូង មកគ្របដើម្បីការពារកូនដំណាំពីកម្ដៅថ្ងៃរយៈពេលក្រោយដាំ ៣-៧ថ្ងៃ។

២.៥ ចន្លោះគុម្ពដំណាំ

ល.រ	ប្រភេទបន្លែ	ចន្លោះគុម្ព	ចំនួនជួរ
១	ខាត់ណាដើម	២៥​x២៥ សង់ទីម៉ែត្រ	៤ ជួរ
២	ខាត់ណាផ្កាបៃតង	៥០x៥០ សង់ទីម៉ែត្រ	២ ជួរ
៣	ខាត់ណាផ្កា ស	៥០x៥០ សង់ទីម៉ែត្រ	២ ជួរ
៤	សាលាដក្ដោប	២០​x២០ សង់ទីម៉ែត្រ	៤ ជួរ
៥	សាលាក្រញ៉ាញ់	២០​x២០ សង់ទីម៉ែត្រ	៤ ជួរ
៦	ស្ពៃក្ដោប	៥០x៥០ សង់ទីម៉ែត្រ	២ ជួរ

ល.រ	ប្រភេទបន្លែ	ចន្លោះគុម្ព	ចំនួនជួរ
១	ស្ពៃក្រញ៉ាញ់	២០​x២០ សង់ទីម៉ែត្រ	៤ ជួរ
២	ស្ពៃខៀវ	២០​x២០ សង់ទីម៉ែត្រ	៤ ជួរ
៣	ស្ពៃចង្កឹះ	២០​x២០ សង់ទីម៉ែត្រ	៤ ជួរ
៤	ស្ពៃជើងទា	២០​x២០ សង់ទីម៉ែត្រ	៤ ជួរ
៥	ស្ពៃតឿ	២០​x២០ សង់ទីម៉ែត្រ	៤ ជួរ
៦	ស្ពៃបូកគោ	៥០x៥០ សង់ទីម៉ែត្រ	២ ជួរ

 

៣. វិធានការការពារដំណាំ

• វិធានការដាំដុះ => ដំណាំឆ្លាស់ជួរ-រង ដំណាំបង្វិល ដំណាំអន្ទាក់-បណ្ដេញ ដំណាំរបងរស់
• វិធានការរូបសាស្រ្ដ => ការគ្រប់គ្រងផ្លាស្ទិច របងផ្លាស្តិច រងគ្របសំណាញ់ ផ្ទះសំណាញ់
• វិធានការមេកានិច => ការភ្ជួររាស់ ចាប់សត្វល្អិតដោយដៃ ការដុតដី អន្ទាក់ពន្លឺ អន្ទាក់ស្អិត
• វិធានការជីវាសាស្រ្ដ => សត្វល្អិតមានប្រយោជន៍ ថ្នាំជីវសាស្រ្ដការពារពីកត្ដាចង្រៃ
• វិធានការគីមី => អន្ទាក់ក្លិន (ស្នេហ៍ស្រាំង) ថ្នាំពុលពុលធម្មជាតិ ថ្នាំពុលគីមី

៤. ការប្រមូលផលដំណាំ

• ការប្រមូលផលធ្វើឡើងតាមប្រភេទបន្លែផ្សេងៗគ្នា បន្លែប្រភេទស្ពៃ និងខាត់ណាដើម ត្រូវកាត់ត្រឹមគល់ ចំណែកប្រភេទសាលាដ ត្រូវដកទាំងឬស មកលាងទឹក ចំណែកឯប្រភេទខាត់ណាផ្កាវិញ ត្រូវកាត់យកដើម ៥សង់ទីម៉ែត្រ នៅពីខាងក្រោមផ្កា
• ត្រូវមើលពីអាយុកាលនៃប្រភេទដំណាំនីមួយៗ
• មុនប្រមូលផលត្រូវផ្អាកការស្រោចស្រព ដើម្បីងាយស្រួលប្រមូលផល មិនបាក់ធាង​ រហែកស្លឹក
• និងប្រើប្រាស់ឧបករណ៍មួយចំនួនក្នុងការប្រមូលផលដូចជា៖ កន្ត្រៃ កន្ត្រក កាំបិត និងកេសក្រដាសជាដើម។

៥. អាយុកាលប្រមូលផលដំណាំ

ល.រ	ប្រភេទបន្លែ	អាយុកាលប្រមូលផល
១	ខាត់ណាដើម	៦០​ ថ្ងៃ
២	ខាត់ណាផ្កាបៃតង	៩០​ ថ្ងៃ
៣	ខាត់ណាផ្កា ស	៩០​ ថ្ងៃ
៤	សាលាដក្ដោប	៤០-៤៥ ថ្ងៃ
៥	សាលាក្រញ៉ាញ់	៤០-៤៥ ថ្ងៃ
៦	ស្ពៃក្ដោប	៩០-១១០​ ថ្ងៃ

 

ល.រ	ប្រភេទបន្លែ	អាយុកាលប្រមូលផល
១	ស្ពៃក្រញ៉ាញ់	៤០-៤៥ ថ្ងៃ
២	ស្ពៃខៀវ	៤០-៤៥ ថ្ងៃ
៣	ស្ពៃចង្កឹះ	៤០-៤៥ ថ្ងៃ
៤	ស្ពៃជើងទា	៤០-៤៥ ថ្ងៃ
៥	ស្ពៃតឿ	៤០-៤៥ ថ្ងៃ
៦	ស្ពៃបូកគោ	៩០​ ថ្ងៃ